အမျိုးသားဒီမိုကရေစီအင်အားစုပါတီမှပေးပို့သော
၂၀၁၄ ခုနှစ်၊ အပြည်ပြည်ဆိုင်ရာဒီမိုကရေစီနေ့ ဂုဏ်ပြုသ၀ဏ်လွှာ
ကျွန်ုပ်တို့ မြန်မာနိုင်ငံတွင် နှစ်စဉ် စက်တင်္ဘာလ(၁၅)ရက်နေ့၌ ကျရောက်သော အပြည်ပြည် ဆိုင်ရာဒီမိုကရေစီနေ့ကို ကျင်းပလာခဲ့သည်မှာ ယခုအခါ စတုတ္ထအကြိမ်မြောက်အထိ ရောက်ရှိလာ ခဲ့ပြီ ဖြစ်သည်။ ရာစုနှစ်ထက်ဝက်မက ဒီမိုကရေစီနှင့်ကင်းဝေးခဲ့ရသော ဤနိုင်ငံတွင် အပြည်ပြည် ဆိုင်ရာဒီမိုကရေစီနေ့ကို တခမ်းတနားကျင်းပနိုင်ခဲ့ခြင်းမှာ ယခုကဲ့သို့ အကူးအပြောင်းကာလတွင် ပြည်သူတို့၏အောင်ပွဲတစ်ရပ်၊ အထိမ်းအမှတ်လက္ခဏာတစ်ရပ်အဖြစ် ကျွန်ုပ်တို့ပါတီမှ မှတ်ယူပါသည်။
၁၉၆၂ခုနှစ်မှစ၍ ဒီမိုကရေစီဆိတ်သုဉ်းခဲ့သော မြန်မာနိုင်ငံတွင် အထွေထွေမကြေနပ်မှုများ နှစ်ပေါင်းများစွာစုစည်းလာမိခဲ့ပြီးနောက် ကျောင်းသားလူငယ်များ၏ ဦးဆောင်မူဖြင့် ၁၉၈၈ခုနှစ်တွင် ရာဇ၀င်တွင်ခဲ့ရသည့် ရှစ်လေးလုံးပြည်သူ့အရေးတော်ပုံကြီး ပေါ်ပေါက်လာခဲ့ရပါသည်။ ခေတ်အဆက် ဆက်တွင် သမိုင်းပေးတာဝန်ကျေပွန်ခဲ့ကြသော လူငယ်များ၏သမိုင်းမှတ်တမ်းကြီးလည်း ဖြစ်ပါသည်။
၁၉၈၈နောက်ပိုင်းကာလများတွင်လည်း ပြည်သူအများ မျှော်လင့်ခဲ့ကြသည့် ဒီမိုကရေစီစနစ် ဖြစ် ထွန်းရေး နှစ်၂၀ကျော် လှုပ်ရှားမှုသမိုင်းတွင်လည်း နိုင်ငံရေးပါတီများနှင့် အဖွဲ့အစည်းအသီးသီးမှ လူငယ်လူရွယ်များသည် အသက်သွေးချွေးနှင့်အတူ စွန့်လွတ်မှုမြောက်မြားစွာတို့ကို ပေးဆပ်ဖြတ်ကျော် ခဲ့ကြရသည်။ ယခု ခေတ်ပြောင်း၊ စနစ်ပြောင်းနှင့် နိုင်ငံတော်သစ်တည်ဆောက်နေသည့် ယနေ့ကာလ များတွင်လည်း လူငယ်များ၏ အခန်းကဏ္ဍမှာ အရေးပါနေဆဲ ဖြစ်သည်။
လူငယ်ဆိုသည်မှာ ရဲရင့်သည်။ တည်ကြည်သည်။ အမှန်တရားကိုမြတ်နိုးသည်။ မှန်မှန်ကန်ကန် ပြောရဲဆိုရဲသည်။ ပြောင်းလဲဖြစ်တည်ရေးကို အစဉ်ရှေ့ရှုသည်။ ထို့ကြောင့် လူငယ်များသည် တိုင်းပြည် နှင့်လူမျိုးအတွက် မျှော်လင့်ချက်နှင့်အနာဂတ်များ ဖြစ်နေ၍ ဤလူ့စွမ်းအားရင်းမြစ်များကို တန်ဖိုးထား ဖော်ဆောင်ပေးနိုင်မှသာ တိုင်းပြည်၏အနာဂတ်သည် ထွန်းပြောင်နေမည် ဖြစ်သည်။ နိုင်ငံတော်သစ် တည်ဆောက်နေချိန်တွင် လူငယ်များ၏ အကျင့်စာရိတ္တ၊ ပညာရေး၊ စွမ်းဆောင်မှုနှင့် နိုင်ငံရေးကိုယ်ရည် ကိုယ်သွေးများ မြင့်မားရေး၊ နိုင်ငံအရေး ကြိုးပမ်းဆောင်ရွက်လိုစိတ်များ ထွက်ပေါ်လာရန်အတွက် တွန်း အားပေးကြရန် လိုနေပါသည်။ ထို့ကြောင့် လူငယ်များအနေဖြင့် နိုင်ငံ၏ ပကတိအခြေအနေနှင့်ကိုက် ညီသော ၊ ခေတ်နှင့်လျှော်ညီသော စိတ်နေစိတ်ထားများနှင့် မူဝါဒများဆီသို့ ရှေ့ရှုဖို့ လိုအပ်နေပါသည်။
ဖက်ဒရယ်ဒီမိုကရေစီပြည်ထောင်စုသစ်ဆီသို့ ချီတက်နိုင်ရန်အတွက် လူငယ်များအနေဖြင့် မိမိ အကျိုး၊ ပါတီအကျိုးနှင့် နိုင်ငံအကျိုးများ တစ်ပြေးညီထွန်းကားလာရေးကို ဦးတည်ဆောင်ရွက်ဖို့ လိုနေ ပါသည်။ အမျိုးသားလုံခြုံရေးနှင့် အမျိုးသားအကျိုးစီးပွားကို နိုင်ငံသားတိုင်းက ထိန်းသိမ်းစောင့်ရှောက် ရန် တာဝန်ရှိသကဲ့သို့ ဒီမိုကရေစီရေး၊ ဖက်ဒရယ်ရေး၊ တန်းတူညီမျှရေးနှင့် လူ့အခွင့်အရေးများ ဖြစ်ထွန်း
လာရေးနှင့် ကျင့်သုံးဖော်ဆောင်ရေးများသည်လည်း အနာဂတ်မျိုးဆက်လူငယ်များ၏ နိုင်ငံရေးတာဝန် ပင် ဖြစ်နေပါသည်။
ထို့ကြောင့် ကျွန်ုပ်တို့ အမျိုးသားဒီမိုကရေစီအင်အားစုပါတီသည် ယခုကဲ့သို့ နိုင်ငံတော်သစ်ကို ပြန်လည်တည်ဆောက်နေချိန်တွင် လူငယ်လူရွယ်များ၏ အတွေးသစ်၊အမြင်သစ်၊ စိတ်သစ်လူသစ်ဖြင့် အဖွဲ့အစည်းပေါင်းစုံနှင့်အတူ ဖက်ဒရယ်ဒီမိုကရေစီနိုင်ငံတော်သစ်တည်ဆောက်ရေးကို အတူလက်တွဲ ဆောင်ရွက်ကြပါရန် တိုက်တွန်းနိုးဆော်လိုပါသည်။ လူကြီးပိုင်း၏ အသိဥာဏ်၊ အတွေ့အကြုံနှင့် အမျှော်အမြင်ရှိမှုနှင်အတူ လူငယ်များ၏ ရဲရင့်တက်ကြွသောလှုပ်ရှားဆောင်ရွက်မှုများတို့ ပူးပေါင်း၍ ပြည်သူအများ မျှော်လင့်နေကြသာ ဖက်ဒရယ်ဒီမိုကရေစီနိုင်ငံတော်သစ်ဆီသို့ အရောက်လှမ်းချီတက် ကြပါရန် ကျွန်ုပ်တို့ အမျိုးသားဒီမိုကရေစီအင်အားစုပါတီမှ ဤအပြည်ပြည်ဆိုင်ရာဒီမိုကရေစီနေ့ အခါသ မယတွင် ကောင်းမြတ်သောနိုင်ငံရေးဆန္ဒဖြင့် သ၀ဏ်လွှာပေးပို့တိုက်တွန်းအပ်ပါသည်။
ဗဟိုအလုပ်အမှုဆောင်ကော်မတီ
၂၀၁၄ခုနှစ်၊ စက်တင်္ဘာလ(၁၅)ရက် အမျိုးသားဒီမိုကရေစီအင်အားစု
No comments:
Post a Comment