အမျိုးသားဒီမိုကရေစီအင်အားစုပါတီ
ကြေညာချက်အမှတ် ၆/၂၀၁၄
ရက်စွဲ။ ၂၃-၆-၂၀၁၄
အချိုးကျကိုယ်စားပြုစနစ်( PR)ကို ပြည်နယ်များမပါ တိုင်းဒေသကြီးများတွင်သာ
ကျင့်သုံးရေးဆိုင်ရာထုတ်ပြန်ချက်
၁။ ကျွန်ုပ်တို့ အမျိုးသားဒီမိုကရေစီအင်အားစု NDF ပါတီ အနေဖြင့် ဇွန်လ ပထမပတ်တွင် အမျိုးသား လွှတ်တော်၌ အချိုးကျကိုယ်စားပြုစနစ် PR ကျင့်သုံးရေးကို ပြည်နယ်များတွင်မပါဘဲ၊ တိုင်းဒေသကြီးများတွင် သာ ကျင့်သုံးရန်အဆိုပြုခဲ့ပါသည်။
၂။ NDFပါတီအနေဖြင့် ၂၀၁၂ခုနှစ်ကာလကပင် ပီအာစနစ်ကို ကျင့်သုံးရန် ပြည်သူ့လွှတ်တော်တွင် တင်ပြခဲ့သည်။ ယခုအခါ ပီအာစနစ်ကျင့်သုံးရေးအဆိုကို ပြည်သူ့လွှတ်တော်တွင် ထပ်မံတင်သွင်းနိုင်ရန် ဆောင်ရွက်ဆဲ ဖြစ်ပါသည်။
၃။ ဤအချိုးကျကိုယ်စားပြုစနစ် ပီအာ ကို အမျိုးသားဒီမိုကရေစီအင်အားစုပါတီအနေဖြင့် ဒီမိုကရေစီမိတ် ဆွေပါတီများအဖွဲ့တွင် စတင်ဆွေးနွေးစဉ်ကပင် ထိုစနစ်အား ပြည်နယ်များတွင်ကျင့်သုံးရန်အသင့်မဖြစ်သေး၍ တိုင်းဒေသကြီးများတွင်သာ စတင်ကျင့်သုံးရန် ဆွေးနွေးခဲ့ကြသည်။ ကျွန်ုပ်တို့ ပါတီအနေဖြင့် ထိုစနစ်အား လက်ရှိမြန်မာ့နိုင်ငံရေး၏ လိုအပ်ချက်တစ်ခုအဖြစ် ရှုမြင်၍ ဆွေးနွေးတင်ပြခဲ့ခြင်းဖြစ်သည်။ တိုင်းရင်းသား လူမျိုးများ၏ အခွင့်အရေးကို ပိတ်ပင်ခြင်း၊ အားနည်းအောင်ပြုလုပ်ခြင်း၊ ဖြစ်စေရန် ဆိုသည့် စွပ်စွဲချက်များသည် အခြေအမြစ် မရှိပါ။ ဤစနစ်ကြောင့်လည်း ထိုသို့ဖြစ်စရာ အကြောင်းလည်း မရှိပါ။
၎။ အမျိုးသားလွှတ်တော်တွင် ပီအာစနစ်ကျင့်သုံးရေးအဆိုကို တင်သွင်းခဲ့သည့် အမျိုးသားလွှတ်တော် ကိုယ်စားလှယ်အား တယ်လီဖုန်းနှင့် ဆက်သွယ်၍ ခြိမ်းခြောက်ခြင်း၊ လွှတ်တော်အတွင်း၌ပင် စောင်းမြောင်း ပြောဆိုခြင်း၊ မီဒီယာများတွင်လည်း ထိုစနစ်ကို တင်ပြသူများသည် နိုင်ငံကိုချောက်ထဲ ဆွဲချသူ၊ ဘုံရန်သူ များအဖြစ် တံဆိပ်ကပ်ထားကြသလိုနှင့် သမိုင်းတရားခံများအဖြစ်ထိပင် ဆန္ဒစွဲဖြင့် ရေးသားဖော်ပြနေခြင်းကို တွေ့နေရပါသည်။
၅။ ထိုသို့ ပြုမှုလုပ်ဆောင်နေသူများအနေဖြင့် ဒီမိုကရေစီသဘောတရားအရ မိမိ၏ဆန္ဒကို လွတ်လပ်စွာ ထုတ်ဖော်ပြောဆိုခွင့် ရှိနေပါသည်။ တစ်ဖက်တွင်လည်း လက်တွေ့တွင် ကွဲပြားခြားနားသော အမြင်တို့ရှိနေသည် ကိုလည်း လက်ခံရမည်ဟူသည့် ဒီမိုကရေစီ၏ အရင်းခံသဘောထားကို မျက်ကွယ်ပြုနေကြသည်မှာ အနာ ဂတ်ဒီမိုကရေစီရေးအတွက် လွန်စွာဝမ်းနည်းဖွယ် ဖြစ်ရပါသည်။ သိက္ခာရှိသော နိုင်ငံရေးနှင့် အဆင့်မြင့်နိုင်ငံရေး ကို လုပ်ဆောင်ကြရန် အမှာအကြားများ ရှိသည့်တိုင် မိမိတို့အမြင်ကို လွတ်လပ်စွာထုတ်ဖော်ခွင့်ရှိပါလျှက် အခြားတစ်ပါးသော အမြင်ကွဲမှုအပေါ် သည်းခံနိုင်မှု မရှိခြင်းအပေါ် ဒီမိုကရေစီနှင့် လူ့အခွင့်အရေးအတွက် များစွာစိုးရိမ်ကြောင့်ကြမှု များ ဖြစ်ရပါသည်။ ပါတီဗဟိုအလုပ်အမှုဆောင်ကော်မတီအစည်းအဝေးတွင် ဤ ပီအာစနစ်ကို ပြည်နယ်များ တွင် အသုံးမပြုရန် ဆုံးဖြတ်ခဲ့ပြီး ဖြစ်သည်။ ထိုသို့ ဆုံးဖြတ်ချက်အတိုင်း ပြည်နယ်များတွင် မကျင့်သုံးရန်ကိုလည်း လွှတ်တော်တွင် တင်သွင်းပြီး ဖြစ်သည်။ သို့စဉ်လျှက် ဝေဖန်ရုံမျှမက တိုက်ခိုက်ပြောကြားလာမှုများကြောင့် ဒီမိုကရေစီ နိုင်ငံသားတို့၏ နိုင်ငံရေးဂုဏ်သိက္ခာကို မထိပါးနိုင်စေရေး အမျိုးသားဒီမိုကရေစီအင်အားစု NDF ပါတီမှ အလေးအနက် တိုက်တွန်းပါကြောင်း သဘောထားထုတ်ပြန်အပ်ပါ သည်။
ဗဟိုအလုပ်အမှုဆောင်ကော်မတီ
အမျိုးသားဒီမိုကရေစီအင်အားစုပါတီ
No comments:
Post a Comment